Gjatë vitit 2024, mijëra qytetarë të Kosovës treguan solidaritet duke dhuruar gjak për ata në nevojë.

2,426 persona dhuruan vullnetarisht, ndërsa 1,107 familjarë kontribuan për të afërmit e tyre, duke ndihmuar në shpëtimin e jetëve.

Instituti Kombëtar i Shëndetësisë Publike të Kosovës (IKSHPK) vlerëson angazhimin e qytetarëve, por thekson se nevoja për gjak mbetet e vazhdueshme.

Sipas ekspertëve, sigurimi i rezervave të mjaftueshme të gjakut është jetik për pacientët që kanë nevojë për ndërhyrje kirurgjikale, trajtime të sëmundjeve kronike dhe emergjenca shëndetësore.

Dhurimi i rregullt i gjakut jo vetëm që shpëton jetë, por edhe ndihmon shëndetin e vetë dhuruesit duke stimuluar rigjenerimin e qelizave të gjakut dhe duke ulur rrezikun e disa sëmundjeve.

IKSHPK dhe qendrat e transfuzionit të gjakut ftojnë qytetarët të vazhdojnë këtë akt humanitar. “Një dhurim – një jetë e shpëtuar” mbetet mesazhi kryesor për të nxitur ndërgjegjësimin dhe rritjen e pjesëmarrjes në këtë mision jetësor.